2018-ci il Azərbaycan üçün bir sıra iqtisadi uğurlarla yadda qalıb. Rəsmi statistikaya nəzər saldıqda, 2018-ci ilin də qeyri-neft sektoru göstəricilərində artım ili olduğunu görürük. Bu isə Azərbaycan iqtisadiyyatının dayanıqlı inkişafı, ölkədə formalaşmış rifah səviyyəsinin qorunub saxlanılması və artırılması baxımından böyük əhəmiyyət kəsb edir.
Bu sözləri AZƏRTAC-a müsahibəsində iqtisad üzrə fəlsəfə doktoru, Azərbaycan Dövlət İqtisad Universitetinin rektorunun müşaviri və Beynəlxalq iqtisadiyyat kafedrasının dosenti Elşən Bağırzadə deyib.
O, qeyd edib ki, 2018-ci ildə ümumi daxili məhsul 1 faiz, qeyri-neft sektoru 1,3 faiz, neft sektoru isə 0,3 faiz artıb. Bu qeyri-neft sektorunun artım tempinin həm neft sektorunun, həm də bütövlükdə iqtisadiyyatın artım tempini üstələdiyini göstərir. Sektorlar üzrə də baxdıqda, rabitə 9,2 faiz, nəqliyyat 7,9 faiz, turizm 7,6 faiz, aqrar sahə 4,6 faiz, ticarət 2,3 faiz, sənayedə isə 1,3 faiz artım olub. Sənayenin neft sektorunda 0,3 faiz artım olduğu halda, qeyri-neft sektorunda bu göstərici 9,1 faiz təşkil edib. Eyni zamanda, ötən il qeyri-neft sektoruna qoyulan investisiyaların 21,2 faiz, qeyri-neft sənayesinə qoyulan investisiyaların isə 22,6 faiz artması göstərir ki, bu da qarşıdakı illərdə qeyri-neft sektorunda artımın davamlılığının təmin edilməsi baxımından əhəmiyyətlidir. İlkin rəqəmlərə əsaslansaq, ötən il ixracda 38,3, o cümlədən də qeyri-neft ixracında 10,9 faizlik baş verən artımı da Azərbaycanın valyuta bazarında və bütövlükdə maliyyə sektorunda sabitliyin təmin edilməsi baxımından əhəmiyyətli hesab etmək olar.
Elşən Bağırzadə 2018-ci ildə bütövlükdə, iqtisadiyyatın hökumətin gündəmindəki əsas məsələlərdən olduğunu vurğulayıb. O bildirib ki, xüsusilə ötən il Azərbaycanın iqtisadi diplomatiyası baxımından zəngin illərdən biri kimi yadda qalıb. Belə ki, ölkə Prezidenti səviyyəsində dünya iqtisadiyyatında mühüm rola malik beynəlxalq təşkilatların, ölkələrin və korporasiyaların rəhbərləri ilə çoxsaylı görüşlər keçirilib, razılaşmalar əldə edilib, Azərbaycanın xarici ölkələrdə ticarət evləri açılıb. İqtisadi baxımdan dünyanın ən güclü yeddi ölkəsindən ikisinin, Almaniya və İtaliyanın dövlət və hökumət başçıları Azərbaycanı ziyarət edib və bu səfərlərdə iqtisadi məsələlər ön planda olub. Ötən il qonşu ölkələrlə iqtisadi əlaqələrin dərinləşdirilməsi istiqamətində də mühüm addımlar atılıb, xüsusilə də Rusiya, Türkiyə, İran, Qazaxıstan və Türkmənistanla bu sahədə müvafiq razılaşmalar əldə edilib.
İqtisadçı alim ötən ilin mühüm iqtisadi hadisələrindən birinin, Aktauda Xəzərsahili ölkələrin “Xəzər Dənizinin Hüquqi Statusu Haqqında Konvensiya”sının imzalanması olduğunu bildirib. O, bu konvensiyanın bütövlükdə Xəzər regionunun gələcək iqtisadi inkişafı, eləcə də Azərbaycanın bu regionda bir çox iqtisadi maraqlarının təmin edilməsi baxımından əhəmiyyətini qeyd edib.
“2018-ci il Azərbaycanın Şimal-Cənub və Şərq-Qərb nəqliyyat dəhlizindəki mövqeyinin möhkəmləndirilməsinə xidmət edən bir sıra layihələrin də tamamlanması ilə yadda qalıb. Bunlar arasında Bakı Beynəlxalq Dəniz Ticarət Limanının və Ələt-Astara-İran dövlət sərhədi avtomobil yolunun tam şəkildə istifadəyə verilməsi xüsusi vurğulanmalıdır.
Azərbaycan iqtisadiyyatının gələcək inkişafı baxımından müstəsna əhəmiyyətə malik Cənub Qaz Dəhlizinin reallaşdırılması istiqamətində də 2018-ci ildə mühüm nəticələr əldə edilib və bu dəhlizin əsas hissəsini təşkil edən TANAP tamamlanaraq, istifadəyə verilib”, - deyə o, əlavə edib.
Elşən Bağırzadə 2018-ci ilin Azərbaycan və Türkiyə iqtisadi əlaqələrinin dərinləşməsi istiqamətində atılmış möhtəşəm bir layihənin tamamlandığı il kimi də tarixə düşdüyünü qeyd edib. Bildirib ki, SOCAR-ın 6,3 milyard ABŞ dolları həcmində investisiya qoyaraq inşa etdiyi nəhəng “Star” neftayırma zavodunun açılışı da məhz bu ildə baş verib: “Bu Azərbaycanın xaricdəki ən böyük investisiyasıdır və Türkiyə iqtisadiyyatının enerji təminatı və dayanıqlı inkişafı baxımından da fövqəladə əhəmiyyətə malikdir”.
