Son illərdə respublikamızda həyata keçirilən islahatların dərinləşməsi və geniş miqyas alması nəticəsində Prezident İlham Əliyevə olan ictimai rəğbət və dəstək daha da artıb. Artıq reallıqda “Azərbaycanda dövlət siyasətinin mərkəzində insan amili dayanır” prinsipi öz ifadəsini tapıb. Belə ki, dövlət başçısının milli maraqlara söykənən siyasəti nəticəsində 2015-ci ildən başlayaraq neft qiymətlərinin kəskin düşməsinə baxmayaraq, Azərbaycanda heç bir sosial layihə dayandırılmayıb, əksinə, son 15 il ərzində – 2003-2018-ci illərdə iqtisadiyyat üç dəfədən çox artıb, yoxsulluq təxminən 50 faizdən 5 faizə düşüb.
Xarici dövlət borcu ən aşağı səviyyəyə enib, bu, ümumi daxili məhsulun cəmi 17 faizini təşkil edib və belə bir göstəriciyə görə, Azərbaycan dünya miqyasında doqquzuncu yerdə qərarlaşıb. Bununla yanaşı, cari ilin ötən ayları ərzində 4 milyon 200 mindən çox insan geniş sosial paketlə əhatə olunub və minimum əməkhaqqı, minimum pensiya əhəmiyyətli dərəcədə artırılıb. Minimum əməkhaqqı təxminən 2 dəfə, minimum pensiya 70 faizdən çox, müavinətlər 2 dəfə, orta əməkhaqqı 35 faiz yüksəlib.
Prezident İlham Əliyev Bakı Dövlət Universitetinin 100 illik yubileyi münasibətilə keçirilən mərasimdəki çıxışında bu barədə ətraflı bəhs edib. Bildirib ki, sosial sahənin inkişafı islahatlarla şərtlənib: “İqtisadi islahatlar nəticəsində təkcə bu ilin on ayında büdcəyə 850 milyon manatdan çox vəsait toplamışıq. Bunları sosial sahəyə yönəldirik. Amma bu, hələ islahatların növbəti mərhələsinin birinci addımlarıdır. Bundan sonra da daha böyük addımlar atılacaqdır. Bu, imkan verir ki, sosial sahəyə böyük diqqət yetirək. Bundan 4 milyon 200 mindən çox insan faydalanıb. Bu il minimum əməkhaqqı iki dəfə, minimum pensiya 70 faiz, müavinətlər iki dəfə, tələbələrin təqaüdləri 50 faiz, köçkünlərə verilən təqaüd 50 faiz artırılıb. Nəyin hesabına? Bu, göydən düşən deyil, bunları islahatların hesabına əldə edirik, əldə də etməliyik”.
Bütün bunlar isə Azərbaycanda reallaşdırılan siyasətin, gerçəkləşdirilən islahatların milli maraqlara söykəndiyindən, milli maraqların isə hakimiyyət üçün hər şeydən üstün olduğundan xəbər verir.
Əlbəttə, cənab İlham Əliyevin fəaliyyətində belə bir prinsipə xüsusi önəm verməsi artıq respublikamızda xalq-iqtidar birliyinin formalaşmasını ifadə edir. Bu məqam beynəlxalq təşkilatlar və sorğu mərkəzləri tərəfindən də mütəmadi olaraq yüksək dəyərləndirilir.
Prezident İlham Əliyev Bakı Dövlət Universitetinin 100 illik yubileyi mərasimindəki çıxışında bu barədə deyib: “Heç kimdən asılı deyilik və elə etməliyik ki, heç vaxt heç kimdən asılı olmayaq. Buna görə güclü olmalıyıq, vətənpərvər olmalıyıq, iqtisadiyyatımız daha da güclü olmalıdır və siyasi iradəmiz yerində olmalıdır. Bugünkü hakimiyyətdə bütün bunlar var və hər kəs görür ki, heç kim bizim işimizə müdaxilə edə bilməz. Nə qədər çalışsalar, nə qədər əlləşsələr, nə qədər yalan-böhtan yaysalar yapışmır bizə. Çünki xalq bizi dəstəkləyir və sonuncu rəy sorğuları onu göstərir”.
Yeri gəlmişkən, Dünya İqtisadi Forumunun “Qlobal Rəqabətlilik Hesabatı”nda “Siyasətçilərə ictimai etimad” kateqoriyası üzrə Azərbaycanın 137 ölkə arasında 20-ci pilləyə yüksəlməsi Prezident İlham Əliyevin siyasətinə əhalinin yüksək etimadının göstəricisi olmaqla yanaşı, həm də beynəlxalq ictimaiyyətin layiqli qiymətidir.
Həmin hesabatda, eyni zamanda, Azərbaycanda iqtidarla xalq arasında böyük etimadın mövcudluğu təsbit edilib, belə bir etimadın isə ictimai-siyasi və iqtisadi sabitliyi möhkəmləndirdiyi vurğulanıb.
Sosial Tədqiqatlar Mərkəzi tərəfindən keçirilən sorğunun nəticələrində də Prezident İlham Əliyevin beynəlxalq və daxili müstəvidə fəaliyyəti əhali tərəfindən milli maraqların qorunması, ümummilli rifahın təmin olunması baxımından olduqca təsirli və əhəmiyyətli hesab edilib. Dövlət başçısının rəhbərliyi ilə reallaşdırılan sosial-iqtisadi islahatlar onun ictimai rəydəki pozitiv imicini daha da gücləndirib.
Vəkil HÜSEYNOV,
Azərbaycan Dövlət İqtisad Universitetinin (UNEC) professoru
