A

UNEC üstünlükləri barədə şagirdlərin məlumatlandırılması layihəsi çərçivəsində professor-müəllim heyətimiz Şəki, Qax, Zaqatala və Balakən rayonlarının qəbul imtahanlarında yüksək nəticələr göstərmiş məktəblərində şagirdlərlə görüşlər keçiriblər.

Tədbirlər zamanı UNEC-in “İstehlak mallarının ekspertizası” kafedrasından Azər Hüseynov, “Nəzəri və praktiki iqtisadiyyat” kafedrasından Namiq Sadıqov, “Mühasibat uçotu və audit” kafedrasından Hənifə Cəfərli məktəblilərə üstünlüklərimiz barədə ətraflı məlumat veriblər. Müəllimlərimiz UNEC-də fəaliyyət göstərən mərkəzlər, fakültələr, əyani, qiyabi və distant təhsil, eləcə də ixtisaslar haqqında geniş məlumat veriblər.

UNEC-də yaradılan tədris mühiti, 24/7 kitabxanası, tələbə-müəllim münasibətləri, elektron universitet (tələbə və müəllimlərin elektron kabinetləri, elektron jurnal, elektron apelyasiya müraciəti) və digər üstünlüklər şagirdlərə çatdırılmışdır.

Məktəblilərin maraqla iştirak etdiyi görüşlərdə qeyd edilib ki, UNEC iqtisadiyyat və biznes profili üzrə Azərbaycanın ən böyük, Şərqi Avropa və Mərkəzi Asiyanın isə 4-cü universitetidir. UNEC-də tədris tamamilə elektronlaşdırılmışdır.

Bütün auditoriyalarımız elektron tribuna və proyektorlarla təchiz edilib. Tələbə və müəllimlər tədris resurslarını elektron kabinetlərindən əldə edə bilirlər. Müəllimlərin dərs zamanı istifadə etdikləri təqdimatlar, testlər, mühazirə mətnləri və digər faydalı resursları tələbələr öz elektron kabinetlərindən yükləyə bilirlər. Dərslərdə tələbələrin qiymətləndirilməsi elektron jurnal vasitəsilə aparılır. İmtahan prosesi də elektronlaşdırılmış platforma bazasındadır və tələbələr qiymətləndirməni buradan izləyə bilirlər. Əgər tələbələrin imtahan nəticəsindən hər hansı narazılığı olarsa, o zaman tələbə müraciətini öz elektron kabinetindən ünvanlayaraq daha operativ cavab ala bilir.

600 və yuxarı bal toplayaraq UNEC-ə qəbul olan tələbələrə əlavə olaraq bir semestr boyunca aylıq 100 AZN həcmində xüsusi təqaüd verilir. Bundan başqa semestrin yekun nəticəsinə görə hər kurs üzrə ən yüksək nəticə göstərmiş 15 tələbəyə universitet hesabına ikinci əlaçı təqaüdü verilir.

Universitet Daxili İkili Diplom (UDİD) proqramı UNEC tələbələrinə 4 il ərzində 2 ixtisas üzrə 2 diplom əldə etmək şansı yaradır. Proqrama qoşulan tələbələr iki ixtisasa yiyələnməklə gələcəkdə əmək bazarında layiqli yer tutmaq və onun tələblərinə çevik uyğunlaşmaq imkanı əldə edəcəklər.

UNEC beynəlxalq əməkdaşlıq sahəsində də tələbələrə böyük imkanlar vəd edir. Avropa universitetləri ilə “Erasmus+”, Türkiyə universitetləri ilə “Mevlana” mübadilə proqramlarından tələbələrimiz maksimum yararlanmaq imkanına sahibdirlər. Mübadilədə iştirak edən tələbələrin xərcləri proqram tərəfindən qarşılanır. Avropanın iqtisadyönümlü ən nüfuzlu ali təhsil ocağı olan London Universiteti/London İqtisadiyyat Məktəbi ilə əməkdaşlıq çərçivəsində LSE diplomunu UNEC-də əldə etmək mümkündür. Fransanın nüfuzlu Monpelye Universiteti ilə həyata keçirilən ikili diplom proqramına uyğun olaraq tələbələrimiz 4 illik təhsilin bir ilini Fransada alaraq, həm UNEC, həm də Monpelye Universitetinin diplomunu əldə edə bilirlər. Bundan başqa Litvanın Mykolas Romeris Universiteti ilə də ikili diplom proqramı da mövcuddur. ABŞ-ın nüfuzlu ali təhsil müəssisəsi olan Linkoln Universiteti ilə də ikili diplom proqramına dair razılıq əldə olunmuşdur və tələbələrimiz bu proqramdan da yararlana biləcəklər.

TOP XƏBƏRLƏR