UNEC-in 90 illik yubiley tədbirləri uğurla davam etdirilir

UNEC-in rektoru, professor Ədalət Muradov universitetin prorektorları ilə onlayn görüş keçirib.

Görüşdə distant dərslərin evdən təşkilinin mövcud durumu, dərslərin keyfiyyəti, tələbələrin dərsə davamiyyəti, qaynar xəttə daxil olan müraciətlər və onların  cavablandırılması, müəllimlərin dərslərdə iştirakı və digər məsələlər müzakirə olunub. Bildirilib ki, distant dərslərin evdən təşkili ilə bağlı bütün texniki imkanlar yaradılıb, yaranan problemlərin isə operatif şəkildə aradan qaldırılması məqsədilə texniki servis xidməti göstərilir. Tələbələrin dərslərdə davamiyyətinin yüksəldiyi və dərslərdə daha aktiv iştirak etdikləri qeyd olunub. Distant dərslərin videoyazılarının şəxsi kabinetlərə göndərildiyi deyilib. Facebook qaynar xəttinə daxil olan müraciətlərin fakültə katiblikləri və müvafiq qurumlar tərəfindən cavablandırıldığı və həlli istiqamətində tədbirlərin görüldüyü  qeyd edilib.

İclasda həmçinin UNEC-in 90 illik yubileyi ilə əlaqədar təsdiqlənən Tədbirlər Planı çərçivəsində görülən işlərdən də bəhs olunub. Bildirilib ki, fevral ayından başlanan yubiley tədbirləri hazırda karantin rejiminə uyğun olaraq uğurla davam etdirilir.