UNEC-də distant təhsillə bağlı pilot layihə həyata keçirilir. Bu gündən humanitar fənlərin tədrisi alternativ kimi distant formada da təşkil olunub.
“UNEC Extern”də ilk olaraq Maliyyə və mühasibat fakültəsində 2019/2020-ci tədris ilinin yaz semestrində “Multikulturalizmə giriş” və “Sosiologiya” fənlərinin distant formada tədrisinə başlanıb. 1-ci kursda əyani təhsil alan tələbələrdən könüllülük prinsipi əsasında 24 tələbə seçilərək distant formada təhsilə cəlb olunub.
Bu fənləri distant formada dinləmək istəyən tələbələrin adları EDUMAN sistemində distant formada tədris üçün yaradılan fənn üzrə qruplara daxil edilib.
Müəllimlər studiyalardan onlayn apardıqları dərslərdə əvvəlcədən EDUMAN sisteminə yüklənmiş tədris materiallarından istifadə edirlər. Tələbənin davamiyyəti və qiymətləndirilməsi isə müvafiq qaydalara uyğun elektron jurnalda aparılır.
Sonda imtahanlar adi qaydada, tələbələrin fiziki iştirakı ilə təşkil olunacaq. Distant qrupun imtahan nəticələri digər qrupların imtahan nəticələri ilə müqayisə olunacaq və nəticələr təhlil ediləcək.
Qeyd edək ki, UNEC-in “Elektron universitet” sistemi və “UNEC Extern”də yaradılmış müasir standartlara uyğun infrastruktur distant təhsilin tam əyanidəki kimi aparılmasına imkan verir. Burada yeganə fərq müəllimlə tələbənin müxtəlif məkanlarda olmasıdır. Qalan bütün proseslər əyani təhsildə olduğu kimi canlı ünsiyyət əsasında qurulur.
Ən müasir texniki avadanlıqlarla təchiz olunan “UNEC Extern”də 6 tədris studiyası var. Yəni burada auditoriyaları studiyalar əvəz edir ki, onların tərtibatı və təchizatı bir çox ABŞ və Avropa universitetlərinin analoji mərkəzlərindən daha üstün təşkil edilib. Onlayn tədris aparılan studiyalarda elektron kürsü, xüsusi sensor lövhə, monitor, HD kamera və səs avadanlıqları quraşdırılıb.
