UNEC-in alimləri  Sahibkarlığa Kömək Milli Fondunda təlim keçiblər.

UNEC-in Maliyyə və maliyyə institutları kafedrasının professoru Zahid Məmmədov bildirib ki, təhsil nazirinin əmri ilə “Milli iqtisadiyyat və iqtisadiyyatın əsas sektorları üzrə strateji yol xəritələrində nəzərdə tutulmuş tədbirlərin icrası ilə bağlı Təhsil Nazirliyinin Strateji Planı” təsdiqlənib. Əmrdən irəli gələn tədbirləri vaxtında və keyfiyyətli icra etmək məqsədilə UNEC-də Strateji Plan hazırlandığına diqqət çəkən professor “Azərbaycan Respublikasında kiçik və orta sahibkarlıq səviyyəsində istehlak mallarının istehsalına dair Strateji Yol Xəritəsi”nin “KOS subyektlərinin maliyyə savadlılığının artırılması” yarımbəndində müəyyən edilən tədbirlərin icrasına start verildiyini vurğulayıb. KOS-ların maliyyə sahəsində bilik və bacarıqlarının artırılmasının əhəmiyyətindən danışan Z.Məmmədov bildirib ki, KOS subyektlərinin maliyyə resurslarına sərfəli və səmərəli çıxışı onların rəqabət qabiliyyətini yüksəldəcək, eyni zamanda, maliyyə resurslarından düzgün istifadəyə müsbət təsir göstərəcək.

Təlimdə UNEC-in “Mühasibat uçotu və audit” kafedrasının dosenti Ənvər Salayev “Elektron mühasibat”, Azərbaycan Beynəlxalq Bankının Təhlükəsizlik Departamentinin baş mütəxəssisi Rəşad Xuduzadə isə “Elektron bankçılıq” mövzularında çıxış ediblər. Hər iki məruzəçı bəhs etdikləri sahənin üstünlükləri, inkişaf istiqamətləri, bu sahədə mövcud vəziyyət və mütərəqqi beynəlxalq təcrübə barədə ətraflı məlumat verib, problemli məsələlərin həlli yollarını izah ediblər.

Sonda mövzu ilə bağlı suallar cavablandırılıb.