Bu gün UNEC-in məzunu, Vətən müharibəsinin şəhidi Rüfət Əsgərovun doğum günüdür, yaşasaydı 24 yaşı olacaqdı.
Rüfət Əsgərovun doğum günü münasibətilə Biznes və menecment fakültəsinin rəhbərliyi və kollektivi, UNEC Tələbə Həmkarlar İttifaqı Komitəsinin sədri və fəal tələbələri şəhidin anası Aynur xanımla onun məzarını ziyarət ediblər. Şəhidin məzarı önünə əklil və gül dəstələri qoyaraq, əziz xatirəsini yad ediblər.
Fakültə dekanı, dosent Mirağa Əhmədov şəhidin anası Aynur xanıma Rüfət kimi qəhrəman oğul böyütdüyü üçün təşəkkürünü bildirərək, bu cür igid oğulların ruhu qarşısında baş əydiyini deyib. Şəhidlərlə yanaşı, onların ailələrinin də UNEC kollektivi üçün əziz və dəyərli olduqlarını bildirib.
M.Əhmədov 44 günlük müharibədə Ali Baş komandan İlham Əliyevin rəhbərliyi iə müzəffər ordumuzun apardığı haqq-ədalət savaşından, işğal altında olan torpaqlarımızın əzəli və əbədi sahiblərinə qovuşduğundan danışaraq, azad edilən hər qarış torpağımızın Azərbaycan əsgərinin qanı, canı ilə yazılmış qəhrəmanlıq salnaməsi olduğunu vurğulayıb. M.Əhmədov şəhidlərin xatirəsinin daim əziz tutulacağını deyərək, onların adlarının əbədiləşdirilməsi üçün UNEC-də müvafiq tədbirlərin həyata keçirildiyini deyib.
Görüşdə Aynur xanım oğlu ilə bağlı xatirələrini UNEC ailəsi ilə bölüşüb, Rüfətin çox mehriban, qayğıkeş olduğundan, vətənini, ailəsini çox sevdiyindən danışıb: “Rüfət Qaraçuxur qəsəbəsində yerləşən S. Bəhlulzadə adına Xarici Dillər Təmayüllü Gimnaziyada orta təhsilini alıb. İbtidai sinifi bitirəndə əlaçı olduğuna görə şəklini məktəbin şərəf lövhəsinə vurmuşdular. Rüfət ürəyi təmiz, mərd, zarafatcıl uşaq olub, məktəb yoldaşları ilə çox mehriban münasibəti var idi. Dərslərinə məsuliyyətlə yanaşırdı, universitetə daxil olmağı, ali təhsil almağı çox arzulayırdı. Elə məktəbi bitirən il, 2015-ci ildə UNEC-in Biznes və menecment fakültəsinə qəbul oldu. 2020-ci il iyun ayında da Dövlət imtahanını uğurla verib, məzun oldu və hərbi xidmətə yollandı. İlk əsgər maaşına bir dəftər almışdı, qalan pulunu da mənə göndərmişdi. Rüfət Xocavənd, Qubadlı, Füzuli uğrunda gedən ağır döyüşlərdə böyük qəhrəmanlıqlar göstərib, düşmənə ağır zərbələr vurub. Sonuncu döyüşü isə oktyabrın 25-də Şuşa uğrunda oldu. Həmin döyüşlərdə oğlum şəhidlik zirvəsinə ucaldı. Rüfət getdi, amma özünnən sonra onu sevən həqiqi dostlar qoydu”.
Rüfətin UNEC-də birlikdə təhsil aldığı tələbə yoldaşı, yaxın dostu, II Vətən müharibəsinin qazisi Ağaəli Quliyev də dostu haqqında qürurla danışırdı: “Rüfət mənim həm tələbə yoldaşım, həm qardaşım idi. İkimiz də eyni vaxta əsgərliyə getdik. Fərqli bölgələrdə xidmət etdiyimiz üçün görüşə bilmirdik. Rüfət şəhid olanda mən komada idim. Sağalandan sonra öyrəndim ki, dostum şəhid olub. Mən onunla fəxr edirəm. Hər zaman deyirəm ki, kaş ki, mən qazi yox, şəhid olardım, cənnətdə dostlarımla birlikdə olardım”.
Tələbələr Rüfət Əsgərovun döyüş yolunun, onun qısa ömrünün hər bir gənc üçün örnək olduğunu bildiriblər. Aynur xanımın yalnız olmadığını, hər birinin onun övladı olduğunu və tez-tez analarını ziyarət edəcəklərini deyiblər.
Görüşdə UNEC THİK sədri Rüfət Süleymanlı şəhidin anasına Fəxri Fərman və üzərində şəhidin rəsmi olan UNEC-in xatirə hədiyyəsini təqdim edib.
UNEC-in şəhid məzunu Rüfət Əsgərov ölümündən sonra “Vətən uğrunda”, “Xocavəndin azad olunmasına görə”, “Fizulinin azad olunmasına görə”, “Qubadlının azad olunmasına görə” medalları ilə təltif edilib.
Binə Şəhidlər Xiyabanında dəfn olunub.
UNEC-in Tələbə Elmi Cəmiyyəti və "UNEC Könüllüləri" Təşkilatı Vətən müharibəsinin şəhidi Rüfət Əsgərova həsr olunan videoçarx hazırlayıblar.
