"UNEC-də Novruz daha gözəl olur" adlı təntənəli bayram tədbiri keçirilib

UNEC-də xalqımızın milli-mənəvi dəyərlərini və qədim adət-ənənələrini özündə yaşadan Novruz bayramı münasibətilə “UNEC-də Novruz daha gözəl olur” adlı təntənəli bayram tədbiri keçirilib.

Tədbirin açılışında çıxış edən UNEC-in rektoru, professor Ədalət Muradov universitet kollektivini təbrik edərək, bu əziz bayramın birlik, həmrəylik və milli dəyərlərin təntənəsi olduğunu vurğulayıb. Novruzun insanlara yenilənmə, ümid və gələcəyə inam aşıladığını deyən rektor, müəllim, tələbə və əməkdaşlara cansağlığı, uğurlar və firavanlıq arzulayıb. Sonra Ədalət Muradov tələbə-rektor Ayan Cavadzadə ilə birlikdə Novruz tonqalını alovlandırıb.

Bayram şənliyində Azərbaycanın müxtəlif regionlarına xas olan Novruz mətbəxinin nemətləri və atributları ilə zəngin guşələr nümayiş olunub. Fakültələr tərəfindən hazırlanmış Novruz xonçaları və milli şirniyyat nümunələri böyük maraqla qarşılanıb. Eyni zamanda, Dizayn Məktəbinin tələbələrinin baharın gəlişi və Novruz ənənələrinə həsr olunmuş rəsm əsərləri sərgilənib.

Tədbirdə Novruzun ənənəvi personajları olan Kosa və Keçəlin iştirakı ilə təqdim olunan səhnəciklər, əyləncəli oyunlar, eləcə də pəhləvanın göstərdiyi nömrələr iştirakçılara xoş anlar yaşadıb. Yaradıcılıq Mərkəzinin vokal, instrumental orkestr və rəqs dərnəklərinin üzvləri olan istedadlı tələbələrin çıxışları isə tədbirə xüsusi bayram ovqatı qatıb.

Əcnəbi tələbələrin də böyük maraqla qoşulduğu şənlik çərçivəsində bayram tonqalının ətrafında yallı gedilərək birlik və həmrəylik nümayiş etdirilib. Tədbir musiqiçilərin ifasında səsləndirilən şən musiqi nömrələri ilə davam edib.