UNEC-in müəllimi Türkiyənin Sakarya Universitetində mübadilə proqramında iştirak edib.
“Beynəlxalq münasibətlər” kafedrasının baş müəllimi Rəsmiyyə Məmmədova “Mövlanə” mübadilə proqramı çərçivəsində Sakarya Universitetində beynəlxalq münasibətlər, siyasi tarix və yeni tarix fənlərini tədris edib. O, “25 il müstəqillik dönəmində Türkiyə-Azərbaycan münasibətləri”, “Birinci Dünya müharibəsindən sonra Osmanlı və Azərbaycan Xalq Cümhuriyyəti arasında siyasi əlaqələr”, “Dağlıq Qarabağ münaqişəsinin həllində Türkiyənin rolu” və digər mövzularda mühazirələr oxuyub.
İki həftə davam edən mübadilə proqramında UNEC müəllimi İqtisad və İdari Bilimlər fakültəsinin Beynəlxalq münasibətlər bölməsinin rəhbəri, professor Ali Balcı və digər professor-müəllim heyəti ilə hər iki universitetdə beynəlxalq münasibətlər ixtisasının tədrisi istiqamətində təcrübələrini paylaşıblar.
R.Məmmədova Sakarya Universitetində tələbə mübadilə proqramında iştirak edən UNEC-in SABAH və Beynəlxalq İqtisadiyyat Məktəbinin tələbələri ilə də görüşüb. UNEC kollektivi türk həmkarları ilə birlikdə Azərbaycanın Dövlət Bayrağı Gününü qeyd ediblər.
