UNEC-in İqtisadiyyat və idarəetmə fakültəsində 18 oktyabr-Müstəqilliyin Bərpası Gününə həsr olunan tədbir keçirilib.
Tədbiri giriş sözü ilə açan fakültə dekanı dos. Elçin Eyvazov qeyd edib ki, SSRİ-nin süqutu dövründə, yəni 18 oktyabr 1991-ci il tarixində "Azərbaycanın dövlət müstəqilliyi haqqında" Konstitusiya Aktının qəbul edilməsi ilə ölkəmizdə Şərqdə ilk respublikanın varisi kimi Azərbaycan tarixinin yeni dönəmi - müstəqil inkişaf dövrü başlayıb. Ulu Öndərin xalqın istəyi ilə Azərbaycana qayıdışı və müstəqilliyimizin təhlükə altına düşməsinin qarşısını alması, xalqımız üçün misilsiz xidmətlər göstərməsi barədə danışan E.Eyvazov vurğulayıb ki, Ulu Öndər tərəfindən qorunub saxlanılan müstəqilliyimiz bu gün Prezident İlham Əliyevin rəhbərliyi ilə daha da möhkəmləndirilir və onun əbədiliyi təmin edilir.
Tədbirdə çıxış edən "Humanitar fənlər" kafedrasının müdiri prof. Vəkil Həsənov vurğulayıb ki, bu aktla Azərbaycan Respublikasının dövlət müstəqilliyinin təmin olunması üçün hüquqi əsaslar yaranmış, ölkəmiz öz dövlət müstəqilliyini bütün dünyaya bəyan etmiş, Azərbaycanın dövlət bayrağı, himni və gerbi haqqında qanunlar qəbul edilmiş, Respublikamızın dövlət müstəqilliyini dünyanın bütün ölkələri tanımış, Azərbaycan Birləşmiş Millətlər Təşkilatına daxil olmuş və dünyanın böyük beynəlxalq təşkilatlarının üzvü olmuşdur.
Sonda tələbələrin sualları cavablandırılıb.
