“Enactus UNEC” komandası “Eco Bottler” adlı yeni ekoloji layihəyə start verir.
Tələbələrin təşəbbüsü ilə UNEC-in bütün tədris binalarında xüsusi qutular yerləşdirilib. Bu barədə “Enactus UNEC” komandasının kapitanı, Beynəlxalq İqtisadiyyat Məktəbinin III kurs tələbəsi Eşqin Cəfərov məlumat verib. “Ekoloji çirklənməyə görə hər gün dünyada 342 azyaşlı həyatını itirir”, deyə bildirən E.Cəfərov ekoloji çirklənmələrin əsasını plastik butulkaların təşkil etdiyini qeyd edib: “Çox təəssüflər olsun ki, hər saniyə orta hesabla istehsal edilən 20000 butulkanın cəmi 10%-i təkrar emaldan keçir.
Biz – “Enactus UNEC” komandası hər il olduğu kimi bu il də layihələrimizdə əsas istiqəmət kimi ekologiyanın, ətraf mühitin qorunmasını predmet götürmüşük. Bu il isə xüsusilə bu ağlasığmaz statistikalarla tanış olduqdan sonra, körpələrimizi və təbiətimizi çirklənmədən qorumaq üçün butulkaların təkrar emalı ilə bağlı layihə hazırlamağı qərara aldıq. Bu məqsədlə UNEC-in hər mərtəbəsinə, yeməkxanaya və həyətə xüsusi qutular yerləşdirdik. Qutular bu gündən etibarən əsas tədris binasında yerləşdirilib. Yaxın günlərdə isə bütün tədris binalarında quraşdırılacaq”.
Devizi “Körpələri və təbiəti qoruyaq” olan “Enactus UNEC” komandası universitetin professor-müəllim və tələbə heyətindən əllərində olan plastik butulkaları və digər plastik məhsulları həmin qutulara atmağı xahiş edir. Toplanan butulkalar təkrar emal üçün AzEkol şirkətinə təqdim ediləcək.
UNEC ailəsinin hər bir üzvünə müraciət edən E.Cəfərov “Qutuya atacağınız hər butulka sayəsində yalnız təbiəti tullantıdan təmizləmiş olmayacaqsız. Həmçinin çirklənmə nəticəsində hər il dünyasını dəyişən uşaqların həyatını xilas edəcəksiniz”, deyə bildirib.
