Universitet inklüziv təhsil sahəsində dünyanın ən yaxşı universitetləri ilə bir sırada dayanmaq istəyir.
“İnklüziv təhsil verən dünya universitetləri siyahısına UNEC-in də adının daxil edilməsini istəyirik. Bu, bizim yeni hədəfimizdir. May ayında Türkiyədə düzənlənəcək inklüziv təhsillə bağlı konfransa qatılacağıq və niyyətimizi dünya universitetləri qarşısında da bəyan edəcəyik. UNEC Azərbaycanda inklüziv təhsilə ehtiyacı olan bütün şəxslərə təhsil üçün zəruri olan şəraiti yaradacaq”. Bu sözləri Azərbaycan Dövlət İqtisad Universitetinin (UNEC) rektoru Ədalət Muradov “Azərbaycan müəllimi”nə açıqlamasında deyib. O, bu istiqamətdə işlərə 2015-ci ildə universitetdə əlilliyi olan tələbələr üçün mərkəzin yaradıldılması ilə başlanıldığını bildirib: “2016-cı ildə sosial şəbəkələr vasitəsilə iqtisadçı olmaq istəyən fiziki məhdudiyyətli gəncləri universitetimizə dəvət etdim. Orada açıq şəkildə bəyan etdim ki, onların fiziki məhdudiyyəti bizim universitetdə təhsil almaları üçün, o cümlədən yaxşı iqtisadçı olaraq yetişmələrində əngəl deyil. Rusiyada inklüziv təhsil sahəsində aparıcı universitet sayılan Moskva Dövlət Humanitar və İqtisad Universiteti ilə ikitərəfli müqavilə imzalanıb. Yaxın vaxtlarda tələbələrimizin həmin universitetdə də təhsil alması istiqamətində işlərimizi tamamlayacağıq. Bundan başqa, inşa olunan yeni tədris korpusunda fiziki məhdudiyyəti olan gənclərin təhsil alması üçün zəruri olan dünya standartlarına uyğun şərait yaradılacaq”.
Rektor ötən il beynəlxalq reytinqlərdə dünyanın ən “yaşıl” 619 universitetindən biri seçilən UNEC-in inklüziv təhsil sahəsində də dünyanın ən yaxşı universitetləri ilə bir sırada dayanacağına əminliyini ifadə edib. Onun sözlərinə görə, UNEC sadəcə təhsil verməklə də kifayətlənməyəcək. Yeni qərara əsasən, Startap layihələri olan tələbələrə dəstək veriləcək: “Fiziki məhdudiyyəti olan tələbələrimizin ortaya qoyacağı 3 startap layihəsini UNEC tamamilə maliyyələşdirəcək. Layihənin icrası, reallaşdırılması üçün nə lazımdırsa, təmin ediləcək”.
Bundan başqa, tələbərin işlə təmin olunması məqsədi ilə də müvafiq tədbirlər düşünülüb. Belə ki, onlar məzun olduqdan sonra elə universitetdəcə işlə təmin olunacaqlar.
Ə.Muradov UNEC-də 26 fiziki məhdudiyyətli tələbənin təhsil aldığını vurğulayaraq deyib ki, indiyədək ən yaxşı məktəblərə gedərək, iqtisadçı olmaq istəyən məktəbliləri İqtisad Universitetinə dəvət etdiklərini vurğulayıb: “Bu il belə bir çağırışla Gürcüstanda da olacağıq. Artıq 120-dən çox şagird sayı olan məktəblərin siyahısını əldə etmişik. 19 belə məktəb var. Orada da nümayəndələrimiz olacaq və Gürcüstanda Azərbaycan dilində təhsil alan məktəbliləri Zaqatala filialımızda təhsil almağa dəvət edəcəyik. Belə səfərlər artıq fiziki məhdudiyyəti olan uşaqların təhsil aldığı məktəblərə də ediləcək və biz oradakı şagirdlərə də deyəcəyik ki, bütün uşaqlar kimi, siz də bizim üçün çox dəyərlisiniz”.
Ruhiyyə Daşsalahlı
