UNEC-də qədim və orta əsrlər Azərbaycan ədəbiyyatının tədqiqi, klassik irsin nəşri, şifahi xalq yaradıcılığı və orta əsrlər ədəbi əlaqələrin öyrənilməsi sahəsində böyük xidmətləri olmuş akademik Həmid Araslının 110 illiyi münasibətilə elmi-nəzəri seminar keçirilib.
Tədbir Maliyyə və mühasibatlıq fakültəsi və “Azərbaycan dili” kafedrasının birgə təşkilatçılığı ilə keçirilib. Kafedranın müdiri, professor Tofiq Əbdülhəsənov tədbirin “Akademik Həmid Araslının 110 illiyinin qeyd edilməsi haqqında” Azərbaycan Respublikası Prezidentinin 2019-cu il 11 fevral tarixli Sərəncamını və Təhsil Nazirliyinin Tədbirlər Planı əsas tutaraq, UNEC rektorunun müvafiq əmrinə əsasən təşkil olunduğunu bildirib.
Tədbirdə görkəmli alim Həmid Araslının çoxcəhətli elmi fəaliyyətindən, Azərbaycan ədəbiyyatı tarixinin formalaşmasında və inkişafındakı misilsiz xidmətlərindən söhbət açılıb. Alimin irsində klassik ədəbiyyat, folklorşünaslıq, mətnşünaslıq, şərq xalqları ədəbiyyatı və müasir ədəbiyyatla bağlı tədqiqatların xüsusi yer tutduğu vurğulanıb.
AMEA-nın N.Gəncəvi adına Ədəbiyyat İnstitutunun aparıcı elmi işçisi, dosent Zəhra Allahverdiyeva görkəmli akademikin ədəbiyyatşünaslıq sahəsindəki tədqiqatlarından söz açıb. İnstitutun aparıcı elmi işçisi, filologiya üzrə fəlsəfə doktoru Təhminə Bədəlova ədəbiyyatşünas alimin həm də şifahi xalq ədəbiyyatının ən görkəmli mütəxəssislərindən biri olduğunu, Azərbaycan folklorunun, xüsusilə də “Kitabi-Dədə Qorqud”, “ Koroğlu” dastanları və aşıq yaradıcılığı haqqında sanballı elmi əsərlər yazdığını qeyd edib.
Tədbirdə Maliyyə və mühasibat fakültəsinin tələbələri Sübhan Niftalıyev və Zərnigar İslamova kafedranın dosenti Gülbəniz İsmayılzadənin rəhbərliyi ilə hazırladıqları təqdimatı nümayiş etdiriblər.
Akademik Həmid Araslının qızı, AMEAnın müxbir üzvü, N.Gəncəvi adına Ədəbiyyat İnstitutunun “Nizamişünaslıq” şöbəsinin müdiri Nüşabə Araslı atası ilə bağlı xatirələrini bölüşüb.
