Azərbaycan Dövlət İqtisad Universitetində (UNEC) klassik ədəbiyyatımızın və folklorumuzun görkəmli tədqiqatçısı, akademik Həmid Araslının 110 illik yubileyi münasibəti ilə növbəti elmi-nəzəri seminar keçirilib.
İqtisadiyyat fakültəsi və “Azərbaycan dili” kafedrasının birgə təşkilatçılığı ilə keçirilən tədbirdə fakültə dekanı, dosent Asiman Quliyev “Akademik Həmid Araslının 110 illiyinin qeyd edilməsi haqqında” Azərbaycan Respublikası Prezidentinin Sərəncamının əhəmiyyətindən danışıb.
“Azərbaycan dili” kafedrasının müdiri, professor Tofiq Əbdülhəsənli akademik Həmid Araslının klassik ədəbiyyat məsələləri, folklorşünaslıq, mətnşünaslıq, şərq xalqları ədəbiyyatı və müasir ədəbiyyatla bağlı tədqiqatlar apardığını bildirib. Azərbaycan ədəbiyyatında özünəməxsus yeri olan alimin çoxsaylı araşdırmaları ilə ölkə ədəbiyyatşünaslığının inkişafına dəyərli töhfələr verdiyini vurğulayıb.
AMEA-nın Nizami Gəncəvi adına Ədəbiyyat İnstitutunun şöbə müdiri, filologiya elmləri doktoru, professor Şirindil Alışanlı görkəmli akademikin ədəbiyyatşünaslıq sahəsindəki tədqiqatlarından söz açıb, Həmid Araslı yaradıcılığının xarakterik xüsusiyyətlərindən danışıb.
Filologiya elmləri doktoru, professor Qəzənfər Paşayev isə ədəbiyyatşünas alimin şifahi xalq ədəbiyyatının ən görkəmli mütəxəssislərindən olduğunu, Azərbaycan folklorunun xüsusilə də “Kitabi-Dədə Qorqud”, “Koroğlu” dastanları və aşıq yaradıcılığı haqqında sanballı elmi əsərlər yazdığını xüsusi vurğulayıb.
Tədbirin sonunda akademik Həmid Araslının həyat və yaradıcılığına həsr olunan videoçarx nümayiş olunub.
!["Əmək bazarında müasir çağırışlar" mövzusunda dəyirmi masa keçirilib](/images/esas2604.jpg ""Əmək bazarında müasir çağırışlar" mövzusunda dəyirmi masa keçirilib")
