UNEC Multikulturalizm Tədqiqat Mərkəzinin rəhbəri, tarix elmləri doktoru, “Humanitar fənlər” kafedrasının professoru Məhəbbət Paşayeva Azərbaycan Milli Elmlər Akademiyasının Arxeologiya və Antropologiya İnstitutunun təşkil etdiyi elmi ekspedisiyaya rəhbərlik edərək İsmayıllı rayonunda Qafqaz Albaniyasına aid etnik və mədəni izləri araşdırıb.
Ekspedisiya nəticəsində əhəmiyyətli elmi faktlar qeydə alınıb və bölgənin qədim tarixini işıqlandıran mühüm maddi-mədəniyyət nümunələri sənədləşdirilib.
AMEA-nın Arxeologiya və Antropologiya İnstitutu ilə UNEC-in Multikulturalizm Tədqiqat Mərkəzinin elmi əməkdaşlığı çərçivəsində həyata keçirilən bu ekspedisiyanın əsas məqsədi İsmayıllı rayonunda qədim alban tayfalarının izlərini araşdırmaq, etnomədəni göstəricilərini müəyyənləşdirmək və antropoloji məlumatları toplamaq olub. Ekspedisiya tarixi Qafqaz Albaniyasının mərkəzi ərazilərindən olmuş İsmayıllı bölgəsinin Qalağah, Vəng, Hapıt, Gənzə, Tubukənd, Qalacıq, Qoşakənd, Mollaisaklı, Kürdeldarbəyli, Hacıhətəmli, Basqal kimi bir sıra kəndlərini əhatə edib. Bölgənin etnik tərkibi və tarixi coğrafiyası, burada qədim alban tayfalarının uzunmüddətli məskunlaşmasına dair zəngin materiallar, habelə alban dövrünə aid qəbiristanlıqlar və ibadətgah qalıqları, maddi-mədəniyyət nümunələri aşkarlanaraq sənədləşdirilib.
Professor Məhəbbət Paşayevanın sözlərinə görə, bu araşdırmalar bölgənin tarixi-mədəni irsinin qorunması və gələcək nəsillərə ötürülməsi baxımından mühüm addımdır. Hazırda materialların sistemləşdirilməsi və təhlili prosesi davam edir. Nəticələrin dövrdə elmi məqalələr şəklində yerli və beynəlxalq akademik jurnallarda dərc olunması nəzərdə tutulur.
![UNEC-də "Keyfiyyətin idarə edilməsi və akkreditasiya prosesləri” mövzusunda təlim keçirilib](/images/telim_020725.jpg "UNEC-də "Keyfiyyətin idarə edilməsi və akkreditasiya prosesləri” mövzusunda təlim keçirilib")
