Azərbaycan Dövlət İqtisad Universiteti (UNEC) ilə Expressbank ASC arasında əməkdaşlığa dair memorandumun imzalanması mərasimi keçirilib.
Tədbirdə çıxış edən UNEC-in rektoru professor Ədalət Muradov universitetdə həyata keçirilən yeniliklər barədə məlumat verib. Ölkədə ilk və yeganə olaraq UNEC-də Bloomberg Maliyyə Laboratoriyasının yaradıldığını, bu laboratoriyanın maliyyə bazarlarının inkişaf etdirilməsinə böyük töhfələr verəcəyini diqqətə çatdırıb.
Expressbank ASC-nin İdarə Heyətinin sədri Mehman Məmmədov Bankla UNEC-in bir sıra layihələrdə əməkdaşlıq etdiyini vurğulayaraq, “Gənc Bankirlər” proqramından danışıb. Proqram çərçivəsində 100-dən çox bakalavr və magistrantın bankın fəaliyyəti, satış və xidmət texnologiyaları, müştəri münasibətləri və işə qəbul prosesi ilə tanış olduqlarını, eləcə də real satış keyslərini praktiki olaraq həyata keçirdiklərini bildirib.
Sonra tərəflər arasında anlaşma memorandumu imzalanıb. Sənədə əsasən, tərəflər praktiki bacarıqların mübadiləsini təmin edəcək, tələbələrin müvafiq istiqamətlər üzrə davamlı inkişafına fayda verəcək bank işi və maliyyə sahəsində birgə tədbirlər və sosial məsuliyyəti artıran layihələr icra edəcəklər. Həmçinin memorandum çərçivəsində UNEC tələbələri istehsalat təcrübəsində iştirak edəcəklər, bankın əməkdaşları isə universitetin tədris prosesinə cəlb olunacaqlar, UNEC tərəfindən təşkil edilən ixtisaslaşma kurslarında iştirak edəcəklər.
