5-11 dekabr tarixlərində Azərbaycan Dövlət İqtisad Universitetində “UNEC Könüllülük Həftəsi” keçiriləcək.
Layihənin məqsədi tələbələrdə könüllülük mədəniyyətini daha da inkişaf etdirmək, onlara sosial məsuliyyət anlayışını aşılamaq və ictimai fəallığı artırmaqdır. UNEC Könüllülük Həftəsi, həmçinin, gənc nəslin sosial məsələlərə, cəmiyyətin inkişafına və ümumi rifaha daha çox diqqət yetirməsini hədəfləyir.
Həftə ərzində tələbələr müxtəlif tədbir və layihələrə qatılaraq, könüllülük anlayışı, onun əhəmiyyətinin və cəmiyyətə olan faydaları ilə bağlı maraqlı məlumatlar əldə edəcəklər. Radio UNEC-də könüllülük fəaliyyətlərinin uğurlu nümunələri və təcrübələri barədə xüsusi proqramlar yayımlanacaq.
Layihə çərçivəsində tələbələr Heydər Əliyev Mərkəzinə ekskursiya edərək, Ulu Öndərin çoxşaxəli fəaliyyəti və zəngin irsi ilə tanış olacaqlar.
Könüllülük Həftəsində bilik və idman yarışları, eləcə də mütaliə və esse müsabiqələri də təşkil ediləcək. Tələbələr yarışlarda iştirak edərək, öz bilik və bacarıqlarını sınayacaq, eyni zamanda komandalar arasında sağlam rəqabət mühiti formalaşdıracaqlar.
