Türkiyənin Milli Təhsil naziri UNEC-də olub

Ölkəmizə səfər edən Türkiyənin Milli Təhsil naziri, Prof. Dr Ziya Selçuk Azərbaycan Dövlət İqtisad Universitetində (UNEC) olub.

Türk Dünyası İqtisad Fakültəsində (TUDİFAK) təşkil olunan görüşdə UNEC-in rektoru, professor Ədalət Muradov, Türkiyənin Azərbaycandakı səfiri Erkan Özoral, Türk Dünyası Araşdırmaları Vəqfinin başqanı Közhan Yazqan, Türk Dünyası Araşdırmaları Vəqfi Bakı Atatürk Liseyinin müdiri Eylem Gültəkin və TUDİFAK-ın dekanı, Prof. Dr Hayati Beşirli də iştirak ediblər. Milli Təhsil nazirini salamlayan rektor Ədalət Muradov bu günün fakültənin tarixində əlamətdar günlərdən biri kimi qalacağını bildirib.

Türkiyənin Milli Təhsil naziri Ziya Selçuk sonra fakültənin müəllim və tələbələri qarşısında çıxış edərək, Türk Dünyası Araşdırmaları Vəqfinin qurucu başqanı rəhmətlik Turan Yazqan tərəfindən əsası qoyulan TUDİFAK-da olmaqdan məmnunluğunu ifadə edib. Ölkələrimiz arasında səmimi, dost və qardaş münasibətlərdən söz açan nazir, iki ölkə arasında təhsil sahəsində əməkdaşlıq əlaqələrinin qurulması istiqamətində görülən işlər barədə ətraflı məlumat verib. Qeyd edib ki, hazırda Türkiyə ilə Azərbaycan arasında təhsil sahəsində çoxsahəli və inkişaf etmiş əlaqələr mövcuddur.

Çıxışında fakültənin müəllimlərinə bir sıra tövsiyələr verən nazir onların tələbələrə qarşı daha diqqətli olmalarının, tələbələrin həyatı və elmi fəaliyyəti ilə daha yaxından maraqlanmalarının vacibliyini önə sürüb. Türkiyəli nazir deyib ki, bu, tələbələrin şəxsiyyət kimi formalaşmaları və gələcək inkişafları baxımından da müsbət nəticə verə bilər.

2040-cı ildə təhsil sahəsində çox önəmli dəyişikliklərin olacağını bildirən nazir “Biz bu dəyişikliklərə hazır olmalıyıq. Bunun üçün də təhsili, təhsil texnologiyalarını məhz buna uyğun olaraq yeniləməliyik” deyib, bu istiqamətdə atılması vacib olan addımlar barədə danışıb.