Qeyri-neft sektorunun inkişafı dünya bazarına çıxış imkanlarını genişləndirib

UNEC nəzdində İqtisadi Araşdırmalar Elmi-Tədqiqat İnstitutunda (İAETİ) Azərbaycan Respublikasının prezidenti İlham Əliyevin sədrliyi ilə 2017-ci ilin sosial-iqtisadi inkişafının yekunlarına və qarşıda duran vəzifələrə həsr olunan Nazirlər Kabinetinin iclasından irəli gələn məsələlərlə bağlı elmi seminar keçirilib.

2017-ci il ərzində ölkənin sosial-iqtisadi inkişafına dair təqdimatla çıxış edən İAETİ böyük elmi işçisi Elman İbişov bildirib ki, ötən ilin müvafiq dövrü ilə müqayisədə ÜDM 0,1 faiz, qeyri-neft sektorunda 2,5 faiz artım baş verıb. Həmçinin baxılan dövr ərzində xarici ölkələrlə ticarət dövriyyəsi 21809,4 milyon ABŞ dolları təşkil edib ki, bunun da 14018,7 milyon dollarını (64,3%) ölkədən ixrac olunan məhsulların, 7790,7 milyon dollarını (35,7%) isə idxal məhsullarının payına düşüb. Nəticədə 6228,0 milyon dollar məbləğində müsbət saldo yaranıb. Bu da, ötən illə müqayisədə xarici ticarət dövriyyəsinin faktiki qiymətlərlə 11,6 faiz artması, o cümlədən ixracın 6,5 faiz, idxalın isə 17,6 faiz azalmasıdır. Hesabat dövründə faktiki qiymətlərlə ölkədən 18,7 faiz çox məhsul ixrac edilib. İdxal olunan məhsul isə 0,9 faiz çox təşkil edib ki, bu da əsasən qeyri-neft sektorunun inkişafı sayəsində ixracı əvəz edən məhsulların həcminin artması və dünya bazarına çıxış imkanlarının genişlənməsinin nəticəsidir.

İAETİ-nin direktoru, professor Yadulla Həsənli ilin yekunları və müzakirələrdən qarşıya qoyulan vəzifələrə diqqət çəkərək, ölkədə həyata keçirilən “Azərbaycan Respublikasının Milli İqtisadiyyat perspektivi üzrə Strateji Yol Xəritəsi”ndə nəzərdə tutulan kadr hazırlığının təkmilləşdirilməsi məqsədi ilə İAETİ-də təhsilin keyfiyyət indikatorlarının iqtisadi inkişafa təsirinin qiymətləndirilməsi üzrə elmi-tədqiqat işinin yerinə yetirildiyini bildirib.

Sonda ölkədə qeyri-neft sektorunun inkişafına dəstək məqsədilə xarici bazarların araşdırılması üçün İAETİ-də genişmiqyaslı elmi-tədqiqat işlərinin aparılması istiqamətində təkliflər səsləndirilib.