Paris Sorbon Universiteti – Abu Dabi professoru: UNEC müəllimlərinin böyük təcrübə və bacarığı var

Fevralın 1-dən 5-dək Azərbaycan Dövlət İqtisad Universitetinin (UNEC) professor-müəllim heyəti üçün “Universitet Sistemində İnteraktiv Təhsil” mövzusunda təlim keçirilib.

UNEC-in Quba Tədris, İdman və İstirahət Kompleksində təşkil olunan təlimdə universitetin 100 müəllimi iştirak edib. Təlimi Paris Sorbon Universiteti – Abu Dabi professoru Florent Pratlong və həmin universitetin rektorunun müşaviri İmran Muxtarov aparıb. unec.edu.az Paris Sorbon Universiteti – Abu Dabi professoru Florent Pratlong ilə müsahibəni təqdim edir:

UNEC-in 100 müəllimi üçün “Universitet Sistemində İnteraktiv Təhsil” mövzusunda təlim keçdiniz. Bir həftə ərzində UNEC müəllimləri bir yerdə olub, onları yaxından tanımaq imkanı əldə etdiniz. UNEC-in pedaqoji potensialını necə qiymətləndirirsiniz?

- Mənim fikrimcə, UNEC müəllimlərinin böyük təcrübə və bacarığı var. Çox aktiv və fəal müəllimlərdirlər. Lakin, bəzi hallarda qrup çalışmalarına çox gərgin yanaşırlar. Məsələyə daha sadə baxsalar, o zaman daha rahat və inkişafyönümlü nailiyyət əldə edə bilərlər. Hesab edirəm ki, bu cür kommunikativ təlimlərdə iştirak etmək müəllimlər üçün faydalı oldu.

- UNEC-in müvafiq sahələrdə inkişafında vacib amilləri nədə görürsünüz?

- Mütləq şəkildə universiteti bir qurum kimi düşünmək, ali təhsil müəssisəsinin brendini, imicini qurmaq çox önəmlidir. Buna görə burda çalışan müəllimlər birlikdə brendin tanınması üçün birgə tam qüvvə ilə çalışmalıdırlar. Mən artıq bu dəyişiklikləri, interaktivləşməni görürəm.

- Sizcə bu təlimlər UNEC müəllimlərinə nə verdi?

- Layihədən sonra UNEC müəllimləri innovativ tədris texnologiyaları barədə biliklərini bir qədər də təkmilləşdirə bildi. Əlavə olaraq, həmkarlar arasında kommunikasiyanın qurulması, faydalı fikir mübadiləsinin aparılması kimi bacarıqlar da aşılandı. Təlimlərdə müəllim mərkəzli tədrisdən, tələbə mərkəzli tədrisə keçid üçün lazımi metodologiya barədə ətraflı məlumat verilib.