UNEC-də yeni yaradılan Xarici Ticarətə Dəstək Mərkəzi (XTDM) ilk tədbirini keçirib.
“İxracın stimullaşdırılmasının dünya təcrübəsi: yanaşmalar və nəticələr” mövzusuna həsr olunan dəyirmi masanın məqsədi regionlar üzrə xarici bazarları öyrənmək, mal qrupları, qrupdaxili mal növləri bazarlarının ümumi tələblərini, o cümlədən bu bazarlarda formalaşan real və potensial alıcıların tədiyyə qabiliyyətli tələbini müəyyən etmək olub. XTDM ilə UNEC-in “Beynəlxalq iqtisadiyyat” kafedrasının birgə təşkil etdikləri tədbirdə müzakirələrin aparılması üçün mərkəzin həmsədri, professor İrşad Kərimlinin rəhbərliyi ilə universitetin professor-müəllim heyətindən ibarət işçi qrupu yaradılıb.
İki gün davam edən dəyirmi masada işçi qrupu Azərbaycanın milli iqtisadiyyatının beynəlxalq iqtisadiyyata interqrasiyası istiqamətində müzakirələr aparıb. Yerli sahibkarların daxili və xarici bazarın ehtiyaclarını ödəyə bilmək istiqamətində real imkanlarını araşdırıb.
Müzakirələrdə UNEC-in xarici universitetlərdə təhsil almış gənc tədqiqatçı müəllimləri Təhmasib Əlizadə, Əhliman Abbasov, Rövşən Camalov, Seymur Əliyev və Elnur İsayev çıxış ediblər. Onlar təhsil aldıqları ölkələrin (Almaniya, İngiltərə, Rusiya, Türkiyə, Finlandiya) ixracatçı sahibkarların stimullaşdırılması sahəsindəki uğurlu təcrübələrini bölüşüblər.
Dəyirmi masanın yekununda mərkəzin həmsədri professor İ.Kərimli işçi qrupunun əldə etdikləri nəticələr barədə məlumat verib. Bildirib ki, ölkənin ixracatçı sahibkarlarını stimullaşdırmaq məqsədilə onlar üçün daha çox xarakterik olan Avropa və İslam-Ərəb regionu üzrə iqtisadi qruplaşmaya daxil olan ölkələrin metod, alət və yanaşmalarından faydalanmaq məqsədəuyğundur. Professor milli brend və xidmətlərlə daxili bazarın ehtiyaclarını tam ödədikdən sonra, xarici bazarın tələblərinə uyğunlaşmanın, ənənəvi bazarlarla yanaşı, yeni bazarlar uğrunda beynəlxalq rəqabətqabiliyyətlilik müstəvisinə çıxmağın əhəmiyyətini vurğulayıb.
Sonda işçi qrupunun üzvləri dəyirmi masada səsləndirilən təkliflər əsasında tərtib olunan biznes planları iqtisadi səmərə əldə etmək məqsədilə aidiyyatı dövlət və özəl qurumlara təqdim etmək qərarına gəliblər.
