“Bütün hallarda təhsilini hansı universitetdə davam etdirmək tələbənin şəxsi seçimidir”.
Bu sözləri AzEdu.az-a özəl açıqlamasında Azərbaycan Dövlət İqtisad Universitetinin rektoru, iqtisad elmləri doktoru Ədalət Muradov deyib:
“UNEC ikili diplom proqramlarını həyata keçirir. Bu proqrama ABŞ-ın Linkoln Universiteti, Fransanın Monpelye və Fransız- Amerikan İSD Universiteti, Litvanın və İsveçrənin Universitetləri, Moskvanın Humanitar İqtisad Universiteti daxildir. Biz bu gün sərgidə bu universitetlərlə tərəfdaşlığımızı nümayiş etdiririk. Bu göstərir ki, bizim universiteti seçən hər bir bakalavr və magistr 4 il ərzində iki diplom əldə edə bilir. Tələbənin istəyinə uyğun olaraq o, 8 universitetdən birini seçir.
Bundan əlavə bizim çoxlu sayda beynəlxalq mübadilə proqramlarımız da var. Bu həm “Erasmus”, həm də “Mövlanə” proqramlarını əhatə edir. Bizim tələbələrimiz öz seçimlərinə uyğun olaraq 6 və ya 1 il müddətinə gedib xarici universitetlərin mübadilə proqramında iştirak edə bilərlər. Biz isə onların orada qazandıqları kreditləri universitetimizə geri döndükləri zaman qəbul edirik.
Bu günkü sərgidə iştirakımızın məqsədi ondan ibarətdir ki, universitetimiz haqqında maraqlanan şəxslərə dolğun məlumatlar verək ki, onlar da öz seçimlərində səhvə yol verməsinlər.
Bütün hallarda təhsilini hansı universitetdə davam etdirmək tələbənin şəxsi seçimidir. UNEC-ə daxil olan tələbə xarici universitetlərdə təhsilini davam etdirmək istəsə, biz ona akademik məzuniyyət veririk. O, qayıtdıqdan sonra isə biz onu yenidən universitetimizə qəbul edirik. İkili diplom proqramlarında akademik məzuniyyətə və təhsili dondurmağa ehtiyac yoxdur. Burada tələbə iki universitetdə oxuyaraq diplomlar əldə etmək şansı qazanır.
“Erasmus” proqramına tələbə şəxsən müraciət edir və burda şərtlər qeyd olunur. Əsas şərt ondan ibarətdir ki, dəvət edən tərəf xərcləri özü qarşılayır. Tələbə isə həmin universiteti seçir və qəbul olunduğu halda onun bütün xərcləri qarşı tərəf vasitəsi ilə ödənilir. “Erasmus” proqramıyla bağlı Avropanın bir çox universitetləri ilə əməkdaşlıq edirik. “Mövlanə” proqramı çərçivəsində isə Türkiyənin bütün universitetləri ilə tərəfdaşlıq həyata keçirilir”.
Rəna Nəbi
