UNEC-də 2023-cü ilin sonuncu Elmi Şura iclası keçirilib.
Çıxışlardan öncə UNEC rektoru professor Ədalət Muradov elm üzrə prorektor vəzifəsinə yeni təyin olunmuş dosent Fariz Əhmədovu Elmi Şura üzvlərinə təqdim edib.
Sonra İmtahan Mərkəzinin direktoru dosent Söhrab İsayev 2023/2024-cü tədris ilinin payız semestrinin ara qiymətləndirmə imtahanlarının yekunları və qış imtahan sessiyasına hazırlıq barədə hesabatla çıxış edib. Bildirilib ki, aralıq imtahanların 456-sı yazılı və 302-si test imtahanı olmaqla keçirilib. İmtahanlarda qaydaların pozuntusu hallarının təqribən üç dəfə azaldığı müsbət hal kimi qiymətləndirilib.
Tədris üzrə prorektor dosent Gəray Musayev isə hibrid formada təşkil ediləcək fənlərin siyahısının artırıldığını, siyahıya yeni 32 fənnin əlavə olunduğunu deyib. Ümumilikdə isə 74 fənn üzrə dərslərin hibrid formada aparılacağını diqqətə çatdırıb.
Elmi Şura cari məsələlərin müzakirəsi ilə davam edib.
Şuranın qərarı ilə xarici dil üzrə IELTS sertifikatı 7 baldan yüksək olan tələbələr “Xarici dil” fənni üzrə 1, 2, 3-lə yanaşı, “Xarici dil – 4” fənnindən də azad ediləcəklər.
İclasda 1 və ya 2 qaib limitini keçmiş əyani və qiyabi təhsil alan tələbələrin imtahana buraxılacağı barədə qərar qəbul olunub. Qərar Zaqatala filialının, eləcə də UNEC nəzdində fəaliyyət göstərən kolleclərin tələbələrinə də şamil olunacaq.
Şuranın sonunda “İqtisadi və texnoloji elmlər” kafedrasında boş olan professor vəzifələrinin tutulması ilə bağlı seçkilər keçirilib. Səsvermənin nəticəsinə əsasən, prof. Arif Şəkərəliyev, prof.Məhiş Əhmədov, prof.Kamil Şahbazov, prof.Rasim Həsənov, prof. Qabil Manafov, prof.Ümidvar Babayev və prof.Əlican Babayev növbəti 5 il müddətinə kafedranın professoru vəzifəsinə seçiliblər.
