UNEC-də Nəsiminin fəlsəfi ideyalarına həsr edilmiş konfrans keçirildi

Bu gün UNEC-də dahi Azərbaycan şairi İmadəddin Nəsiminin 650 illiyi ilə əlaqədar "Böyük Azərbaycan şairi İmadəddin Nəsiminin əsərlərində sosial və humanitar fəlsəfi ideyaların əsas istiqaməti" adlı konfrans keçirilmişdir.

Konfransda UNEC rektoru, professor Ədalət Muradov, AMEA-nın Humanitar Elmlər Bölməsinin akademik-katibi, M.Füzuli adına Əlyazmalar İnstitutunun direktoru akademik Teymur Kərimli iştirak edirdilər. 

Elmi fəaliyyətin təşkili və idarəedilməsi departamentinin və “Azərbaycan dili” kafedrasının birgə təşkilatcılığı keçirilmiş tədbiri giriş sözü ilə açan rektor, professor Ədalət Muradov məhz Ulu öndər Heydər Əliyevin təşəbbüsü ilə Nəsiminin 600 illiyinin keçirildiyini və bu il Azərbaycan Respublikasının prezidenti İlham Əliyevin göstərişi ilə bu il Nəsiminin 650 illiyinin keçirildiyini diqqətə çatdırdı. UNEC-də Nəsimi ili ilə əlaqədar silsilə tədbirlərin keçirildiyini nəzərə çatdıran rektor, UNEC Tələbə Teartının Nəsimi əsərləri əsasında hazırladıqları teatrın nümayişi üçün Türkiyənin Kars vilayətinə səfər edəcəyini və digər tədbirlərin planlaşdırdığını bildirdi.

Dahi şairin Azərbaycan dilində yazdığını, özündən əvvəl olmuş şairlərin ənənələrini yaşatdığını bildirən rektor, Nəsimi ideyaları, Nəsimi irsi barədə danışdı. Böyük Azərbaycan xalqının zaman zaman dahi şairlər yetişdirdiyini qeyd edən rektor bu sırada Nəsiminin xüsusi yer tutduğunu nəzərə çatdırdı. Ə.Muradov Nəsimi irsinə biganə qalmaq mümkün olmadığını, Nəsiminin digər şəxslərdən fərqləndirən cəhətin onun əqidəsi olduğunu diqqətə çatdırdı. Rektor layiqli vətəndaşın yetişdirilməsi üçün layiqli vətəndaş olmağın zəruriliyi, Nəsimi irsində vətənpərvərlik, istənilən zaman vətənin daşına çevrilməyə hazırlıq ideyalarına toxundu.

Akademik T.Kərimli öz çıxışında dahi filosof Nəsimiyə verilən böyük dəyər haqqında söhbət açdı. O qeyd etdi ki, ancaq Azərbaycan xalqı kimi böyük bir xalq Nəsimi kimi nəhəng şəxsiyyəti yetişdirə bilərdi. T.Kərimli qeyd etdi ki, Nəsimi insanın dünyaya bir missiya ilə gəldiyinə, insanların biri birinə sevgi və dəyər ilə yanaşmalı olduğuna inanırdı. T.Kərimli Nəsimi əsərlərində olan humanizm, azadlıq ideyaları haqqında söhbət açdı. Azərbaycan xalqı nadir xalqlardan biridir ki, quldarlıq dövrü keçməyib, həmişə azad bir xalq olaraq, insan azadlığı ideları həmişə önə keçirilib. Bu ideyalar bizim klassik ədəbiyyatda, o cümlədən Nəsimi əsərlərində də öz əksini tapıb. Nəsimi inanırdı ki, insanın simasında ərəb əlifbasının hərfləri öz əksini tapıb, insan müqəddəsdir, insan dünyaya xoşbəxt olmaq üçün gəlir.

Bizim ana dilində yazan ilk sənətkarlardan olan Nəsiminin əsərlərinin təsiri altında Fizuli və Xətai kimi böyük şairlərimiz yetişmişdir. Buna baxmayaraq Nəsimi uzun müddət unudulmuş bir sənətkar olub, ədibimiz Salman Mumtaz onun əsərlərini əsrlər keçdikdən sonra çap etdirərək həyata qaytarıb. T.Kərimli qeyd etdi ki, Ulu öndər Heydər Əliyevin əməyi nəticəsində Nəsimi bolşevik hasarından keçirilərək yenidən dünyaya çatdırıllıb.

Tədbirdə UNEC-in “Azərbaycan dili” kafedrasının müdiri, professor Tofiq Əbdülhəsənli “Nəsimi irsi müasir humanitar düşüncə kontekstində” və kafedranın professoru Maarifə Hacıyeva “İmaməddin Nəsiminin şeirlərində folklor qaynaqları” mövzusunda çıxış ediblər. Konfransda AMEA-nın Əlyazmalar İnstitutunun, AMEA-nın Nəsimi adına Dilçilik İnstitutunun əməkdaşları iştirak edirdilər. 

Tədbirdə “Azərbaycan dili” kafedrasının və UNEC Yaradıcılıq Mərkəzinin təşkilatcılığı ilə tələbələrin ifasında Nəsiminin yaradıcılığına həsr edilmiş şeir parçalarının səsləndirilməsi auditoriya tərəfindən xüsusi maraqla qarşılandı.