“Elm günləri”ndə İslam maliyyə sistemi mövzusunda təqdimat keçirilib

Azərbaycan Dövlət İqtisad Universitetində (UNEC) “Elm günləri” çərçivəsində növbəti tədbir “İslam maliyyə sistemi” mövzusunda olub.

Tədbirin moderatoru, UNEC İslam Maliyyə Tədqiqat Mərkəzinin direktoru, professor Zahid Məmmədov hazırda dünyanın 92 ölkəsində islam iqtisadiyyatının tətbiq olunduğunu diqqətə çatdıraraq, bu iqtisadiyyatın sürətlə inkişaf etdiyini bildirib. O, İslam maliyyəsi prinsipləri ilə idarə olunan bütün aktivlərin həcminin qlobal miqyasda 3 trilyon dolları keçdiyini deyib.

Sonra UNEC İslam Maliyyə Tədqiqat Mərkəzinin tədqiqatçısı Əfqan Musayev “İslam maliyyə sistemi” mövzusunda təqdimatla çıxış edərək, islam maliyyə sisteminin fəlsəfəsi, əsas subyektləri barədə ətraflı məlumat verib. İslamda maliyyə-iqtisadi münasibətlərin ədalət, əxlaq, dürüstlük prinsiplərinə əsaslandığını bildirib. İMS-nin əsas subyektlərinin İslam bankları olduğunu deyən məruzəçi, islam maliyyəsini ənənəvi maliyyə sistemindən fərqləndirən amilləri açıqlayıb.

Təqdimatda işğaldan azad olunan ərazilərin bərpası məsələsinə toxunan Ə.Musayev, İslam banklarının, alternativ maliyyə institutlarının Qarabağ iqtisadiyyatının dirçəldilməsi prosesinə cəlb edilməsinin vacibliyini də vurğulayıb.

Çıxışlardan sonra müzakirələr aparılıb, iştirakçılar pandemiya dövründə İslam banklarının fəaliyyəti ilə bağlı tədqiqatlarının aparılmasının, ərəb mənşəli iqtisadi terminlər lüğətinin hazırlanmasının əhəmiyyətindən danışıblar.

UNEC-in rəsmi facebook səhifəsində canlı yayımlanan tədbirdə iştirakçıların mövzu ilə bağlı sualları məruzəçi tərəfindən cavablandırılıb.

Xatırladaq ki, 15-30 mart UNEC-də “Elm günləri” elan olunub. “Elm günləri”ndə UNEC-in tədqiqat mərkəzləri və fakültələrinin xarici universitetlər, elmi tədqiqat institutları ilə birgə onlayn elmi seminarları, dəyirmi masaları və elmi müzakirələri təşkil olunur.