UNEC-də “Xəzəryanı ölkələrin təhsil xidmətləri bazarının əməkdaşlıq perspektivləri (Azərbaycan və Qazaxıstanın əmək bazarının təhlili əsasında)” mövzusunda onlayn seminar keçirilib.
Tədqiqat mərkəzlərinin işinin əlaqələndirilməsi və təşkili şöbəsi, Analitik İnformasiya Resursları UNEC Tədqiqat Mərkəzi və Ş.Yessenov adına Xəzər Dövlət Texnologiyalar və Mühəndislik Universitetinin (Aktau, Qazaxıstan) təşkilatçılığı ilə keçirilən seminarda hər iki universitetin əməkdaşları iştirak edib.
Seminarı giriş sözü ilə açan UNEC tədqiqat mərkəzlərinin işinin əlaqələndirilməsi və təşkili şöbəsinin müdiri Rəna Hüseynova mövzunun aktuallığına diqqət çəkib, tədbirin bu istiqamətdə əhəmiyyətini vurğulayıb.
Sonra Xəzər Dövlət Texnologiyalar və Mühəndislik Universitetinin Maliyyə kafedrasının dosenti Bibibgül Saubetova təqdimatla çıxış edərək elm və texnologiyaların inkişafının əmək bazarında yeni ixtisasların yaradılmasını şərtləndirdiyini deyib. Ali təhsil müəssisələrinin əmək bazarının tələblərinə çevik reaksiya verməli olduqlarını deyən məruzəçi, bu istiqamətdə təkliflərlə çıxış edib.
Xəzər Dövlət Texnologiyalar və Mühəndislik Universitetinin təhsil proqramları üzrə koordinatoru İlkin Orucov isə içtirakçılara Qazaxıstanın təhsil sistemi barədə ətraflı məlumat verib, təhsilin ölkə vətəndaşlarının peşəkar və mənəvi keyfiyyətlərinin inkişafına kömək edən daimi təhsil və təlim prosesi olduğunu vurğulayıb.
Tədbirdə çıxış edən Analitik İnformasiya Resursları UNEC Tədqiqat Mərkəzinin rəhbəri Esmira Əhmədova pandemiyanın Azərbaycan və Qazaxıstanın əmək bazarına təsirlərindən danışıb. O, əmək bazarındakı mövcud vəziyyəti təhlil edərək iqtisadi fəal və qeyri-fəal, məşğul və işsiz əhalinin statistikası barədə ətraflı məlumat verib. Pandemiyadan sonrakı dövrdə ölkələrin əmək bazarının bərpa edilməsi üçün düzgün yol seçmələrinə şərait yaradan bir sıra təkliflər verib.
Seminar iştirakçılar tərəfindən maraqla qarşılanıb, mövzu ətrafında geniş müzakirələr aparılıb, məruzəçi tərəfindən iştirakçıları maraqlandıran suallar cavablandırılıb.
Seminar UNEC Tədqiqat Mərkəzlərinin İşinin Əlaqələndirilməsi və Təşkili Şöbəsinin rəsmi facebook səhifəsi üzərindən canlı yayımlanıb, həmçinin seminarın posteri Ş.Yessenov adına Xəzər Dövlət Texnologiyalar və Mühəndislik Universitetinin rəsmi saytında (yu.edu.kz) paylaşılıb.
![Tələbə və məzunların diqqətinə: "Trade Group LLC" şirkəti vakansiya elan edir!](/images/Trade-Group-LLC_201124.gif "Tələbə və məzunların diqqətinə: "Trade Group LLC" şirkəti vakansiya elan edir!")
