Müstəqillik və Azərbaycanın maliyyə strategiyası modeli

UNEC-də “Müstəqillik və Azərbaycanın maliyyə strategiyası modeli” mövzusunda tədbir keçirilib.

"Maliyyə və maliyyə institutları" kafedrası tərəfindən təşkil olunan tədbir Azərbaycan Respublikasının dövlət müstəqilliyinin bərpasının 30-cu ildönümü ilə bağlı UNEC-in təsdiqlədiyi Tədbirlər Planı çərçivəsində baş tutub.

"Maliyyə və maliyyə institutları" kafedrasının müdiri, professor Əvəz Ələkbərov müstəqilliyin bərpasının ilk illərindən söz açaraq, həmin dövrdə respublikada yaranmış ağır şəraitdən, ictimai-siyasi sahədəki qeyri-sabitlikdən danışıb. Ulu öndər Heydər Əliyevin yenidən hakimiyyətə gəlməsi ilə Azərbaycanın sürətlə inkişaf etdiyini, ölkəmizin sosial-iqtisadi, siyasi sahədə ciddi uğurlara imza atdığını bildirib. Ümummilli liderin müəllifi olduğu neft strategiyasının uğurlu və səmərəli nəticələri barədə məlumat verən kafedra müdiri, bu strategiyanın ölkəmizin sosial-iqtisadi inkişafındakı, eləcə də maliyyə dayanıqlığındakı rolundan da bəhs edib.

Sonra professor Elnur Sadıqov “Müstəqillik və Azərbaycanın maliyyə strategiyası modeli” mövzusunda çıxış edib. O, ulu öndər Heydər Əliyev tərəfindən əsası qoyulan və Prezident İlham Əliyev tərəfindən inamla həyata keçirilən ölkənin maliyyə strategiyasının uzunmüddətli perspektivə hesablandığını və iri miqyaslı məsələlərin həllini özündə ehtiva etdiyini vurğulayıb.

Tədbir mövzu ilə bağlı çıxışlarla davam edib. Çıxış edənlər Prezident İlham Əliyevin həyata keçirdiyi qətiyyətli iqtisadi siyasət sayəsində ölkənin durmadan artan maliyyə imkanlarından, beynəlxalq əhəmiyyətli strateji infrastruktur layihələrdən, makroiqtisadi inkişafın dayanıqlığını təmin edən amillərdən danışıblar.