UNEC və AACHEN Universiteti arasında əməkdaşlıq memorandumu imzalanıb

Azərbaycan Dövlət İqtisad Universiteti (UNEC) və Almaniyanın AACHEN Universiteti arasında əməkdaşlıq əlaqələrinin inkişaf etdirilməsi məqsədilə qarşılıqlı anlaşma memorandumu imzalanıb.

İmzalanma mərasimində UNEC-in rektoru professor Ədalət Muradov, AACHEN Universitetinin İTA İnstitutunun direktoru professor Thomas Gries, ITA Academy GmbH-nin Türkiyə üzrə regional nümayəndəsi Esra Yüksel Yılmaz, “Synergia Academy” rəhbəri Rəna Əfəndiyeva, şirkətin təlim üzrə baş məsləhətçisi Aytən Cəbrayılova və universitetin digər əməkdaşları iştirak ediblər.

Görüş zamanı UNEC rektoru professor Ədalət Muradov universitetin təhsil imkanları, rəqəmsal idarəetmə sistemi, beynəlxalq əlaqələri, ikili diplom və mübadilə proqramları, dünya reytinqlərindəki mövqeyi barədə ətraflı məlumat verib.

Professor Thomas Gries UNEC-in müasir tədris yanaşmalarını yüksək qiymətləndirərək, iki universitet arasında əməkdaşlığın əhəmiyyətini vurğulayıb. Görüşün nəticəsi olaraq, UNEC və AACHEN Universiteti arasında əməkdaşlıq memorandumu imzalanıb.

Memorandum çərçivəsində tələbə və müəllim mübadiləsi, birgə konfransların təşkili, elmi-tədqiqat layihələrinin hazırlanması, beynəlxalq sertifikat proqramlarının reallaşdırılması, ömürboyu təhsil və innovativ tədris metodları üzrə təcrübə mübadiləsi, eləcə də ətraf mühitin idarə edilməsi sahəsində birgə tədbirlərin keçirilməsi nəzərdə tutulur.