UNEC-in 24/7 kitabxanasında hüq.f.d.Ərəbiyyə Mustafayevanın müəllifliyi ilə UNEC nəşriyyatında yeni işıq üzü görmüş “Əmək hüququ üzrə işçinin məsuliyyətinin hüquqi tənzimlənməsi” adlı dərs vəsaitininin təqdimat mərasimi keçirilib.
Tədbiri giriş sözü ilə açan UNEC-in Elm və innovasiya məsələləri üzrə prorektoru, f.e.d., prof. Rövnəq Rzayev nəşrin təkcə müvafiq sahə üzrə təhsilalanlar və tədqiqatçılar üçün deyil, həm də, işəgötürənlər və işçilərin daxil olduğu geniş oxucu kateqoriyası üçün aktuallıq kəsb etdiyini vurğulayaraq, müəllifə yeni yaradıcılıq uğurları arzulayıb.
UNEC Kitabxana-İnformasiya Mərkəzinin direktoru, tar.ü.f.d. Adilə Abdullayeva əmək hüququnun tənzimlənməsi sahəsində yeni ədəbiyyatların azlığına diqqət çəkərək, təqdim olunan dərs vəsaitini müvafiq istiqamətdə boşluğu dolduran və kompleks yanaşma əsasında hazırlanan dəyərli nəşr əsəri kimi xarakterizə edib.
Dərs vəsaitinin müəllifi hüq.f.d. Ərəbiyyə Mustafayeva kitabın yaranması ideyası, əsərin ərsəyə gəlməsi prosesi, istifadə olunmuş ədəbiyyatların əsas xüsusiyyətləri və ümumiləşdirilmiş tədqiqat nəticələri haqqında məlumat verib.
Təqdimat mərasimində iştirak edən UNEC-in professor-müəllim heyəti və qonaqlar müəllifi təbrik edərək, dərs vəsaiti haqqında yüksək fikirlər söyləyiblər və müəllifə gələcək elmi-pedaqoji fəaliyyətində uğurlar arzulayıblar.
Sonda kitab müəllifin imzası ilə iştirakçılara hədiyyə olunub.
