UNEC-in 24/7 Kitabxanasının 6 yaşı tamam oldu

UNEC Kitabxana İnformasiya Mərkəzinin 24/7 kitabxanasının fəaliyyətə başlamasının 6 ili tamam olub.

Kitabxananın 6-cı ildönümü münasibətilə “UNEC KİM-in 24/7 Kitabxanası: Yeni hədəflərə doğru” mövzusunda tədbir keçirilib. Tədbirdə elm və innovasiya məsələləri üzrə prorektor prof. Rövnəq Rzayev kitabxana əməkdaşlarını təbrik edərək, fəaliyyətlərində uğurlar arzulayıb. R.Rzayev hər bir şəxsin təhsilində, fərdi inkişafında, eləcə də iş həyatında kitabxanaların, mütaliə mədəniyyətinin əhəmiyyətindən söz açıb. Sonra KİM-in direktoru tar.ü.f.d. Adilə Abdullayeva UNEC kitabxanalarının fəaliyyətindən, davamlı yenilənən kitabxana xidmətlərindən bəhs edib. A.Abdullayeva UNEC kitabxanalarında UNEC tələbələrinin də əmək fəaliyyətinə cəlb olunduğunu da diqqətə çatdırıb. 24/7 Kitabxananın müdiri Arzu Məmmədova isə kitabxanada həyata keçirilən layihələr barədə iştirakçıları məlumatlandırıb, kitabxana könüllülərinin, eləcə də “Kitabxana könüllüləri”nin koordinatoru, Maliyyə və mühasibat fakültəsinin “Mühasibat” ixtisasının III kurs tələbəsi İlqar Əliyev kitabxananın fəaliyyətindəki rolundan danışıb.

UNEC CLUBRARY kitab klubuna fəaliyyətindəki yeniliklər barədə, klubun rəhbəri yerinə namizədliyini irəli sürən Biznes və menecment fakültəsinin “Menecment” ixtisasının III kurs tələbəsi Ziyad Ağayev də tədbirdə çıxış edərək, klubun gördüyü işlərdən söz açıb. Sonda 24/7 Kitabxananın layihə və tədbirlərində aktiv iştirak edən fəal oxucu-istifadəçilər Fəxri diplom və təşəkkürnamələrlə təltif ediliblər.